करमाळा (सोलापूर) : तालुक्यातील श्री आदिनाथ सहकारी साखर कारखाना सुरू करण्यासाठी आज (रविवारी) श्री आदिनाथ सहकारी साखर कारखान्यावर व संगोबा येथील आदिनाथ मंदिर येथे अभिषेक करून कारखाना दुरुस्तीचे काम हाती घेतले जाणार आहे, अशी माहिती मुख्यमंत्री एकनाथ शिंदे गटाच्या शिवसेनेचे जिल्हाप्रमुख महेश चिवटे यांनी दिली आहे.
आरोग्य मंत्री प्रा. तानाजी सावंत यांनी आदिनाथ कारखान्याच्या खात्यावर अनामत रक्कम म्हणून नऊ कोटी रुपये भरत आदिनाथ साखर कारखाना सहकारी तत्त्वावर सुरू करण्याचा मार्ग मोकळा केला. रविवारी या हंगामाच्या तयारीच्या कामाचा शुभारंभ केला जात आहे.
आदिनाथ साखर कारखाना भाड्याने देण्याची प्रक्रिया तीन वर्षांपूर्वी राज्य सहकारी बँकेने केली होती. या प्रक्रियेत आमदार रोहित पवार यांच्या बारामती ॲग्रोने सहभाग घेऊन त्यांना हा कारखाना मिळाला होता. मात्र निविदा प्रक्रिया झाल्यानंतर हा कारखाना किमान 25 वर्षे भाडे कराराने आम्हाला द्या, असा प्रस्ताव बारामती ॲग्रोने बँकेकडे दिला होता.
नियमानुसार हा कारखाना 15 वर्षापेक्षा जास्त कालावधीसाठी देता येत नव्हता. त्यातच या कारखान्यावर एनसीडीसी बँकेचे 40 कोटी कर्ज आहे, ते आम्हाला बँकेने सांगितले नाही, असे सांगत बारामती ॲग्रोने दोन वर्षात करार केला नाही.
त्यानंतर माजी आमदार नारायण पाटील बागल गटाच्या नेत्या रश्मी बागल, शिवसेना जिल्हाप्रमुख चिवटे यांच्यासह अनेक पदाधिकाऱ्यांनी हा कारखाना सहकारी तत्त्वावर सुरू करण्यासाठी मंत्री सावंत यांच्याकडे मागणी केली होती, त्यानुसार पैसे भरल्यानंतर आता आदिनाथ कारखाना सुरू करण्यासाठी प्रयत्न केला जात आहे, असे चिवटे यांनी सांगितले.
