करमाळा (सोलापूर) : टेंभुर्णी (ता. माढा) येथील ‘शिवविचार प्रतिष्ठानच्या’ पहिल्या वर्धापनदिना निमित्त आज (बुधवारी) दसरा मेळावा होणार आहे. या मेळाव्यात विविध क्षेत्रातील उल्लेखनीय काम केल्याबद्दल करमाळा तालुक्यातील ग्रामसुधार समितीचे अध्यक्ष डॉ. ॲड. बाबुराव हिरडे यांना ‘सामाजिक पुरस्कार’ दिला जाणार आहे. या प्रतिष्टानकडून विविध क्षेत्रातील पाच व्यक्तींची पुरस्कारासाठी निवड करण्यात आली आहे, अशी माहिती शिवविचार प्रतिष्ठानचे संस्थापक अध्यक्ष विजय खटके पाटील यांनी दिली आहे.
आज सायंकाळी ६ वाजता टेंभुर्णी येथे या पुरस्कारांचे वितरण होणार आहे. कार्यक्रमाच्या अध्यक्षस्थानी पंढरपूर- माढा विधानसभा मतदारसंघाचे आमदार बबनराव शिंदे असणार आहेत. आमदार संजयमामा शिंदे यांच्या हस्ते या पुरस्काराचे वितरण होणार आहे. विठ्ठलराव शिंदे महाविद्यालयाचे प्राचार्य महेंद्र कदम व शिवव्याख्याते हर्षल बागल यावेळी उपस्थित राहणार आहेत.
मावळा ग्रुप कुर्डूवाडी यांचा महिला दांडिया व मालवण येथील संजोबा लेझीम संघ तसेच बबनराव शिंदे प्रशाला अकोले बुद्रुक यांचे लेझीम पथक मुलींचा तसेच बबनराव शिंदे प्रशाला अकोले यांचा तलवारबाजी मुलांचा असे विविध कार्यक्रम घेण्यात येणार आहेत. या कार्यक्रमाचे संयोजन गणेश व्यवहारे, गणेश शिंदे, सचिन पवार, योगेश खराडे पाटील, अजय जाधव, पाटलू भाऊ खटके, हनुमंत ढवळे, सागर कटके यांनी केले आहे.
यांना जाहीर झाले पुरस्कार…
‘जिजाऊ सामाजिक पुरस्कार’ स्मिता पाटील यांना तसेच ‘सामाजिक पुरस्कार’ डॉ. ॲड. बाबूराव हिरडे यांना ‘साहित्यिक पुरस्कार’ प्रा. संजय साठे यांना तसेच ‘कृषी भूषण पुरस्कार’ सोमनाथ हुलगे, ‘व्यसनमुक्त पुरस्कार’ बाळासाहेब माने यांना जाहीर करण्यात आला आहे.
