करमाळा (सोलापूर) :
तालुक्यामध्ये 91 हजार 500 गाय व म्हैस वर्गीय जनावरे आहेत. लंपी हा विषाणूजन्य रोग गायी व म्हशींमध्ये आढळतो. या रोगात पशुंना ताप येणे, पूर्ण शरीरावर 10 ते 15 मि.मी. व्यासाच्या कडक गाठी येतात व तोंडात, नाकात व डोळ्यांत व्रण येतात. सदरचा विषाणूजन्य रोग प्रादुर्भाव विविध प्रकारचे कीटक गोचिड, गोमाश्या इत्यादीं मार्फत जलद प्रसार होतो.
तालुक्याच्या सीमेवरील अहमदनगर व पुणे जिल्ह्यात या रोगाची साथ वाढत असल्याने करमाळा पशुसंवर्धन विभागातील अधिकारी व कर्मचारी यांना सदर रोगाच्या अनुषंगाने सतर्क राहण्याच्या सूचना दिलेल्या आहेत. या रोगाला घाबरून न जाता पशुंमध्ये या रोगाची लक्षणे आढळल्यास त्वरित जवळच्या पशुवैद्यकीय संस्थेत कळवावे. बाधित जनावरे वेगळी बांधावी. त्यांची चारा, पाणी व इतर अनुषंगिक साहित्य सुद्धा वेगळे ठेवावे.
प्रथम निरोगी जनावरे यांना चारा- पाणी करावे व नंतर बाधित जनावरे यांच्याकडे जावे व त्यांचा चारापाणी करून घ्यावा. बाधित जनावरे यांच्यावर पशुवैद्यकीय अधिकारी/कर्मचारी यांच्या सल्ल्यानुसार त्वरित औषधोपचार सुरू करावेत. गोठा व लगतच्या परिसरात डास, माशा, कीटक व गोचिड यांचा प्रादुर्भाव कमी करण्यासाठी डेल्टामेथ्रिन, सायपरमेथ्रिन सारखी औषधे पशुवैद्यकीय अधिकारी व कर्मचारी यांचे मार्गदर्शनानुसार वापरावीत.
सदर रोगावर नियंत्रण मिळवण्यासाठी पशुपालकांनी घाबरून न जाता जागरूक होण्याचे व नमूद प्रतिबंधात्मक उपाययोजना करण्याचे आवाहन तहसीलदार समीर माने-अध्यक्ष लंपी चर्मरोग संनियंत्रण समिती, गट विकास अधिकारी मनोज राऊत-सदस्य लंपी चर्म रोग संनियंत्रण समिती व पशुधन विकास अधिकारी डॉ. प्रवीण शिंदे-सदस्य सचिव लंपी चर्मरोग संनियंत्रण समिती यांनी केले आहे.
