करमाळा (सोलापूर) : जिल्हा नियोजन समितीमधून पालकमंत्री जयकुमार गोरे यांच्या सूचनेनुसार उजनी जलाशयामध्ये मत्स्य बोटुकली संचयन करण्यासाठी मंजुरी मिळाली आहे; अशी माहिती माजी आमदार संजयमामा शिंदे यांनी दिली आहे.
माजी आमदार शिंदे म्हणाले की, ‘पालकमंत्री गोरे यांच्याकडे मे २०२५ मध्ये उजनी जलाशयामध्ये बोटुकली संचयन करण्यासाठी १ कोटी ५० लाख निधीची मागणी केली होती. त्या मागणीस यश आले असून ६० लाख निधी बोटुकली संचयनासाठी मंजूर झाला आहे. उजनी जलाशय हे राज्यात मत्स्य व्यवसायासाठी अग्रेसर असणारे जलाशय आहे. मासेमारीचे हक्क मत्स्य विभागाकडे नसून ते जलसंपदा विभागाकडे आहेत. उजनी जलाशयावर सर्व जातीधर्माचे लोक मासेमारी करुन आपला उदरनिर्वाह करीत आहेत. परंतू जलसंपदा विभागाकडे मत्स्यबीज संचयनासाठी आर्थिक तरतुद नसल्याने २७ ते २८ वर्षेपासून उजनी जलाशयामध्ये मत्स्यबीज संचयन झालेले नाही. त्यामुळे मत्स्यबीज संचयन न झाल्याने जलाशयामध्ये कार्प जातीचे मासेच शिल्लक राहिले नाहीत. उजनी जलाशयामध्ये मत्स्यबीज सोडणेसाठी महाराष्ट्र राज्य मच्छिमार संघर्ष कृती समितीने मागणी केलेली आहे. तरी उजनी जलाशयाच्या सिंचन क्षमतेनुसार मत्स्यबीज संचयन खरेदी करणेसाठी १.५० कोटी निधी मंजूर करणेत यावा अशी विनंती शिंदे यांनी केली होती.
सदर मागणीस यश आले असून उजनी जलाशयामध्ये मत्स्य बोटुकली संचन करण्यासाठी ६० लाख व बार्शी तालुक्यातील जवळगाव मध्यम प्रकल्पामध्ये मत्स्यबोटूकली संचयनासाठी ६० लाख निधी मंजूर झाला आहे. यापूर्वीही २०१९ ते २४ या कालावधीत शिंदे यांच्या प्रयत्नांमधून २ कोटी निधी मत्स्यबोटूकली संचनासाठी मंजूर झालेला होता. आता माजी आमदार असताना सुद्धा संजयमामा शिंदे यांच्या प्रयत्नातून ६० लाख निधी मत्स्यबोटुकली संचयनासाठी उपलब्ध झाल्यामुळे महाराष्ट्र राज्य मच्छिमार संघर्ष कृती समितीने माजी आमदार शिंदे यांचे आभार मानले आहेत.
