करमाळा (सोलापूर) : करमाळा नगरपालिका निवडणूक ‘करमाळा शहर विकास पॅनल’ पूर्ण ताकदीनिशी लढवणार असल्याची माहिती मुख्य प्रवर्तक कुणाल पाटील यांनी प्रसिद्धीपत्रकाद्वारे दिली आहे.
करमाळा नगरपालिकेच्या निवडणुकीसाठी प्रभागातील २० नगरसेवक व नगराध्यक्षपदाचे आरक्षण जाहीर झाले आहे. त्यामुळे राजकीय चर्चा देखील वाढू लागल्या आहेत. कुणाल पाटील यांनी ‘करमाळा शहर विकास पॅनल’ची घोषणा केली आहे. सर्व जागांवर उमेदवार देणार असल्याचे त्यांनी स्पष्ट केले आहे. लवकरच वचननामाही जाहीर करणार असल्याचे त्यांनी सांगितले आहे. विकासाचा वचननामा आणि भ्रष्टाचार विरहित नगरसेवक शहराच्या विकासाच्या अनुषंगाने काम करतील. शहरात आतापर्यंत केवळ विकासाच्या गप्पा झाल्या आहेत. मूलभूत सोयी सुविधा मिळण्यापासून नागरिकांना वंचित राहावे लागत आहे’, असे ते म्हणाले आहेत.
‘अकलूज, बारामती शहरे पूर्णपणे विकसित शहरे झालेले आहेत त्याचप्रमाणे विकासाचे मॉडेल करमाळा शहरात आम्ही अनणार आहोत. कोणताही नगरसेवक भ्रष्टाचार करणार नाही. नागरिकांच्या प्रश्नावरती प्रभागामध्ये जाऊन त्यांचे प्रश्न समजून घेऊन विकास आराखडा तयार केला जाईल. शहरांमध्ये धुळीचे साम्राज्य, रस्त्याची दुरावस्था, पिण्याच्या पाण्याचे ढिसाळ नियोजन, रहदारी समस्या, स्वच्छता, उधान, टाऊन हॉल, फुटपाथ, हद्दवाढ भागामध्ये मूलभूत सुविधा या सर्व समस्या प्राधान्याने सोडविण्यास भर राहणार आहे, असे त्यांनी म्हटले आहे. नगराध्यक्ष तसेच सर्व नगरसेवक पदासाठी समविचारी पॅनल उमेदवार उभे करून जनतेसमोर जाणार आहोत’, असेही पाटील यांनी सांगितले आहे.
