करमाळा (अशोक मुरूमकर) : करमाळा उपजिल्हा रुग्णालयातील १०० खाटांच्या मान्यतेनंतर इमारत बांधकाम करण्यासाठी आणखी अडीच कोटी मंजुर झाले असुन दोन कोटी रक्कम वर्ग करण्यात आली असल्याची माहिती आमदार नारायण पाटील यांनी दिली आहे.
नागपूर येथे आजपासून (सोमवार) राज्याचे हिवाळी अधिवेशन सुरु झाले आहे. आमदार पाटील यांच्याकडुन करमाळा मतदार संघातील प्रलंबीत कामांचा पाठपुरावा सुरू आहे. अधिवेशनाच्या पहिल्याच दिवशी पुरवणी मागणीत निधीची तरतूद करण्यासाठी त्यांचा पाठपुरावा सुरु होता. आमदार पाटील म्हणाले, करमाळा उपजिल्हा रुग्णालयात १०० खाटांची मागणी आपण या पुर्वीच केली होती. त्यास मंजुरी मिळवण्यात यश आले होते. आता आपण नियोजित रिटेवाडी उपसा सिंचन योजनेच्या सर्वेक्षणासह अनेक महत्त्वाच्या कामांचा पाठपुरावा सुरु ठेवला आहे. यातील उपजिल्हा रुग्णालय इमारत बांधकाम करणेसाठी आणखी दोन कोटी ५२ लाख ३१ रुपयांची मंजुरी मिळवली आहे. यातील दोन कोटी तातडीने संबंधित विभागाकडे वर्ग करण्यात येत आहेत.
उपजिल्हा रुग्णालय सक्षमीकरण करण्यास आणखी हातभार लागणार असल्याचे आमदार नारायण आबा पाटील यांनी सांगितले. करमाळा उपजिल्हा रुग्णालय हे करमाळा तालुक्यासाठी अतिशय महत्त्वाचे रुग्णालय असुन या ठिकाणी करमाळा शहरासह जवळपास पन्नास हुन अधिक गावातील रुग्ण उपचारासाठी येतात. येथील रुग्णालयात आणखी अद्यावत सुधारणा करण्यासाठी आपला पाठपुरावा चालू आहे. तसेच येथील डॉ. तथा कर्मचाऱ्यांची रिक्त पदे व अद्यावत उपचार मशीन उपलब्ध करण्यासाठी आपण प्रयत्नशील असल्याचेही आमदार नारायण आबा पाटील यांनी सांगितले.
