करमाळा (सोलापूर) : करमाळा शहरातील पंजाब वस्ताद चौक ते पोथरे नाका या मेनरोडच्या डांबरीकरणास आमदार नारायण पाटील यांच्या निधीतून मंजुरी मिळाली आहे. माजी आमदार जयवंतराव जगताप यांच्या पाठपुराव्याला यश आले असून अनेक दिवसांपासून व्यापाऱ्यांनी जगताप यांच्याकडे याबाबत निधीची मागणी केली होती.
माजी आमदार जगताप यांचा शहरातील रस्त्यांच्या डांबरीकरण व कॉंक्रिटीकरणा सोबतच आरोग्याच्या दृष्टीने महत्त्वाची मानली जाणारी भुयारी गटार योजना व पाणीपुरवठ्याच्या दृष्टीने महत्त्वाची अमृत – 2 योजनेच्या मंजुरीच्या दृष्टीने देखील पाठपुरावा सुरू आहे, असे प्रसिद्धिपत्रकाद्वारे सांगितले जात आहे. ‘माजी आमदार जगताप यांच्यावर विश्वास ठेवून शहरवासीयांनी मतरूपी आशीर्वाद दिला होता. त्यास पात्र राहून माजी आमदार जगताप शहर विकासाच्या दृष्टीने सांगतील ती कामे करण्यास कटिबद्ध आहे. करमाळा शहरातील समस्या सोडवण्यासाठी माजी आमदार जयवंतराव जगताप यांनी आग्रह आणि निधी मंजूर करून घेतला आहे’, असे आमदार पाटील यांनी म्हटले आहे.
