करमाळा (अशोक मुरूमकर) : तालुक्यातील शेलगाव (वां) येथे भारतीय कृषी अनुसंधान परिषदअंतर्गत (ICAR) केळी संशोधन केंद्र उभारण्याबाबत खासदार धैर्यशील मोहिते पाटील यांनी आज (गुरुवार) दिल्ली येथे केंद्रीय कृषिमंत्री शिवराजसिंह चौहान यांची भेट घेतली.
महाराष्ट्र राज्याचा देशातील केळी उत्पादनात 14.26 टक्के वाटा आहे. भारतातून निर्यात होणाऱ्या केळीपैकी सुमारे 63 टक्के केळी महाराष्ट्रातून होते. सोलापूर जिल्हा निर्यातक्षम केळी उत्पादनासाठी प्रसिद्ध आहे. गेल्यावर्षी राज्यातून झालेल्या 12 लाख 43 हजार 899 मेट्रिक टन केळी निर्यातीपैकी सुमारे 8 लाख 26 हजार 322 मेट्रिक टन केळी सोलापूर जिल्ह्यातून निर्यात झाली आहे, असे खासदार मोहिते पाटील यांनी केंद्रीय कृषिमंत्री चव्हाण यांना सांगितले.
शेलगाव (वां) येथे सुमारे 100 एकर शासकीय जमीन उपलब्ध असून विद्यमान राज्य फळ नर्सरी तसेच शुष्क क्षेत्र संशोधन केंद्राच्या पायाभूत सुविधांमुळे केळी संशोधन केंद्रासाठी हे ठिकाण योग्य आहे. या हंगामात जिल्ह्यात सुमारे 32 हजार हेक्टर क्षेत्रात केळी लागवड आहे. शेतकऱ्यांच्या हितासाठी केंद्राने तातडीने सकारात्मक निर्णय घ्यावा, अशी भूमिका खासदार मोहिते पाटील यांनी मांडली.
केळी उत्पादनात जागतिकस्तरावर स्पर्धात्मक क्षमतेसाठी वैज्ञानिक संशोधन, नवीन वाणांची निर्मिती, कीड- रोग व्यवस्थापन, प्रशिक्षण सुविधा अत्यावश्यक असल्याने करमाळा तालुक्यातील शेलगाव वांगी येथे केळी संशोधन केंद्र उभे करावे, अशी मागणी त्यांनी केली.
