करमाळा (अशोक मुरूमकर) : करमाळा एसटी स्टँड परिसरात बेशिस्तपणे वाहन पार्किंग करणाऱ्यांवर करमाळा पोलिसांनी महाराष्ट्र राज्य परिवहन महामंडळाच्या तक्रारीनंतर जोरदार कारवाई सुरु केली आहे. आज (गुरुवार) दिवसभरात साधारण १७ वाहनांवर वाहतूक पोलिसांनी कारवाई केली असल्याची माहिती आहे.
करमाळा एसटी स्टँड परिसरात सध्या काँक्रिटीकरणाचे काम सुरु आहे. त्यात बेकायदा बेशिस्तपणे वाहन पार्किंग केल्यामुळे एसटी उभा करण्यासाठी चालकांना अडचणी येत आहेत. शाळा व महाविद्यालय सुटल्यानंतर विद्यार्थ्यांची मोठी गर्दी बसस्थानकावर असते. त्यात बेशिस्तपणे बेकायदा वाहने पार्किंग केल्याचा त्रास होत असल्याच्या तक्रारी येत होत्या. एसटी महामंडळाने देखील तक्रारी केल्या आहेत. याची दखल करमाळा पोलिस ठाण्याचे पोलिस निरीक्षक रणजित माने यांनी घेतली असून बेशिस्तपणे वाहन उभा करणाऱ्यांवर कारवाई सुरु केली आहे.
एसटी स्टँड परिसरात बेकायदा बेशिस्तपणे वाहने उभा करून नागरिकांना अडथळा निर्माण होईल अशी वाहने उभा करू नये असे आवाहन करण्यात आले आहे. अशी वाहने उभा केली तर कारवाई सुरूच राहील, असे सांगण्यात आले आहे.
