करमाळा (सोलापूर) : मनोज जरांगे पाटील यांनी मराठा समाजाला ओबीसीमधून आरक्षण मिळवे यासाठी केलेल्या मागण्या पूर्ण करण्यासाठी आज (मंगळवार) कुंभेज फाटा येथे रास्ता रोको आंदोलन करण्यात आले.
यावेळी मनोजदादा जरांगे पाटील यांनी मागणी केलेली सगेसोयरे संबंधीची अंमलबजावणी तात्काळ करण्यात यावी, पडताळणी कार्यालयात एजंटचा सुळसुळाट झाला असून दाखले मिळण्यासाठी लाखो रुपये मोजावे लागतात. एजंटवर तात्काळ कारवाई करून गुन्हे दाखल करावेत, कुणबी नोंद सापडलेल्या मराठा बांधवांना सुलभ पद्धतीने तात्काळ दाखले मिळावेत, मराठा विद्यार्थी- विद्यार्थीनींना शैक्षणीक सवलती व वसतिगृह भत्ता मिळण्यासंबंधी सर्व विद्यापीठांना तात्काळ आदेश देण्यात यावेत,
मराठा समाजाला दिलेले ५० टक्केच्या आत व लोकसंख्येच्या प्रमाणात घटनात्मक कक्षेत बसणारे आरक्षण द्यावे, मराठा आंदोलकांवर दाखल करण्यात आलेले गुन्हे तात्काळ मागे घेण्यात यावेत, सारथी व आण्णासाहेब पाटील महामंडळाची कार्यक्षमता वाढवावी
आदी मागण्यांचे निवेदन देण्यात आले.
सोलापूर येथील समन्वयक टीमने आंदोलकांना मार्गदर्शन केले. सोलापूरहुन ज्येष्ठ मार्गदर्शक राजन जाधव , माऊली पवार, रवी मोहीते, अँड. श्रीरंग लाळे, महेश पवार आदी उपस्थित होते.
‘सनदशीर मार्गाने दीर्घकाळ चाललेला हा लढा मराठ्यांना ओबीसीमधून आरक्षण मिळाल्यावरच थांबेल. तोपर्यंत मनोज जरांगे पाटलांच्या पाठीशी करमाळा तालुक्यातील समाजबांधव खंबीरपणे उभे आहेत. वरून जो आदेश येईल तो मानून आंदोलन सुरू राहील.
- सचिन काळे, तालुकाध्यक्ष, मराठा सेवा संघ
