करमाळा (अशोक मुरूमकर) : करमाळा तालुक्यातील १०८ ग्रामपंचायतच्या सरपंच पदाचे एप्रिलमध्ये काढण्यात आलेले आरक्षण रद्द झाले असून आता मंगळवारी १५ जुलैला फेर आरक्षण सोडत होणार आहे. यासाठी जिल्हाधिकारी कुमार आशीर्वाद यांच्या आदेशाने आरक्षण सोडतीसाठी ठिकाण आणि वेळ ठरली आहे, अशी माहिती तहसीलदार शिल्पा ठोकडे यांनी दिली आहे.
ओबीसींच्या २७ टक्के आरक्षणाची अमंलबजावणी करण्यासाठी सर्वोच्च न्यायालयाच्या आदेशाने सरपंच पदासाठी फेर आरक्षण सोडत होणार आहे. तालुक्यातील १०८ ग्रामपंचायतीच्या सरपंच पदासाठी एप्रिलमध्ये आरक्षण सोडत झाली होती. त्यामध्ये मिळालेल्या आरक्षणाने समाधान झालेल्या इच्छुकांची मात्र आता धाकधूक वाढली आहे. ग्रामविकास विभागाच्या आदेशाने पुन्हा ही आरक्षण सोडत होणार आहे. गावागांमध्ये सध्या ग्रामपंचायत निवडणुकीचे भावी सरपंचांना आरक्षणाचे वेध लागले आहेत. त्यात आरक्षण सोडत होऊन इच्छेप्रमाणे जिथे आरक्षण पडले नव्हते त्या भावी सरपंचांचा हिरमुड झाला होता. मात्र आता पुन्हा आरक्षण सोडत होणार असल्याने त्यांना लॉटरी लागणार का? याची उत्सुकता निर्माण झाली आहे. मंगळवारी १५ जुलैला करमाळा पंचायत समितीच्या सभागृहात १२ वाजता आरक्षण सोडत होणार आहे. यासाठी इच्छुकांनी उपस्थित राहण्याचे आवाहन तहसीलदार शिल्पा ठोकडे यांनी प्रसिद्धिपत्रकाद्वारे केले आहे.
