करमाळा (सोलापूर) : तालुक्यातील मांजरगाव येथे बेकायदा दारू विक्री करणाऱ्या एकाविरुद्ध करमाळा पोलिसात गुन्हा दाखल झाला आहे. चंद्रकांत अंकुश चव्हाण (वय ३७) असे गुन्हा दाखल झालेल्या संशयित आरोपीचे नाव आहे. संशयित आरोपीकडून ५ हजार ७४० रुपयांचा मुद्देमाल जप्त करण्यात आला आहे. करमाळा उपविभागीय पोलिस अधिकारी कार्यालयाकडून ही कारवाई झाली आहे. पोलिस कॉन्स्टेबल मनजीत भोसले यांनी यामध्ये फिर्याद दिली आहे.
पेट्रोलिंग सुरु असताना पारेवाडी ते कुंभेज फाटा रोडवर मांजरगाव येथे एकजण बेकायदा दारू विक्री करत असल्याची माहिती पोलिसांना मिळाली होती. त्यानंतर त्यांनी संबंधित ठिकाणी छापा टाकला तेव्हा गुन्हा दाखल झालेला संशयित बेकायदा दारू विक्री करत असताना दिसला, असे फिर्यादीत म्हटले आहे. पृथ्वीराज वडापाव सेंटरच्या मागे हा संशयित दारू विक्री करत होता, असेही फिर्यादीत म्हटले आहे.
