करमाळा (अशोक मरुमकर) : ‘साखर कारखानदारी अडचणीत आहे. मात्र तरीही श्री आदिनाथ सहकारी साखर कारखाना आपल्या ताब्यात दिल्यास आपण हा कारखाना चांगला चालवून दाखवू’, असे म्हणत माजी आमदार संजयमामा शिंदे यांनी निवडणुकीसाठी दंड थोपटले आहेत. ‘मी कारखाना विकला आणि चालले आदिनाथ चालवायला असा आरोप आता केला जाईल मात्र त्याचे कारण काय आहे? हे योग्यवेळी स्पष्ट केले जाईल. माझ्याकडे कोणाचेही देणे राहिलेले नाही. आपण शेअर्सचेही पैसे परत करत आहे’, असे ते म्हणाले.
पुढे बोलताना माजी आमदार शिंदे म्हणाले, ‘कारखानदारी अडचणीत आहे. पण तरीही सरकारच्या माध्यमातून आपण आदिनाथ कारखाना चांगला चालवू. यासाठी मुख्यमंत्री देवेंद्र फडणवीस यांच्यासह उपमुख्यमंत्री अजित पवार व एकनाथ शिंदे यांचीही मदत घेऊ. या कारखान्याला उर्जित अवस्था आणायची आहे. त्यासाठी आपण प्रयत्न करू. हा कारखाना म्हणजे करमाळा तालुक्याची अस्मिता आहे. कारखान्यात जसे तोटे आहेत. तसे बाहेर कसे पढायचे हेही आपल्याला माहित आहे. कारखाना हा माझ्यासाठी राजकारणाचा विषय नाही.’
श्री आदिनाथ सहकारी साखर कारखान्याची निवडणूक जाहीर झाली असून निवडणूक लढण्याबाबत माजी आमदार संजयमामा शिंदे समर्थकांची करमाळ्यात विचारविनिमय बैठक झाली. या बैठकीला करमाळा तालुक्यातील कार्यकर्त्यांसह आदिनाथच्या कार्यक्षेत्रातील जामखेड तालुक्यातलही कार्यकर्ते उपस्थित होते. यामध्ये निवडणूक लढण्याबाबत निर्णय झाला असून युती- आघाडी करायची की कसे हे नंतर पाहू पण सर्व इच्छुकांनी अर्ज दाखल करावेत, असे आवाहन यावेळी केले आहे.
माजी आमदार शिंदे म्हणाले, ‘आदिनाथ कारखाना हा कारखाना कसा अडचणीत आला यावर चर्चा करण्यापेक्षा आपण हा कारखाना कसा चांगला चालवू यावर भर दिला जाईल. सभासदांनी आपल्या ताब्यात हा कारखाना दिला तर कारखाना क्षेत्रातील आपला अनुभव व कौशल्याच्या जोरावर हा कारखाना सरकारची मदत घेऊन चालवू,’ असे त्यांनी स्पष्ट केले.
पुढे बोलताना ते म्हणाले, ‘विधानसभा निवडणूक झाल्यापासून शिंदे गटाबाबत काहीजण चुकीची माहिती पसरवत आहेत. काहीही झाले तरी मी करमाळ्याला विसरणार नाही. मतदारसंघातील ३६ गावे येत्या काळात वगळण्यात आली तरी मी करमाळा मतदार सोडणार नाही. करमाळा हीच माझी कर्मभूमी आहे आणि या मतदारसंघावर माझे प्रेम आहे. त्यामुळे असे गैरसमज पसरवणाऱ्यांकडे दुर्लक्ष करा’, असे म्हणत त्यांनी अपवा पसरवणाऱ्याला टोला लगावला आहे.
‘करमाळा तालुक्यात मला विधानसभा निवडणुकीत दोन नंबरची मते आहेत. याची जाण आहे. माझ्या काळात विकास कामे करण्यावर मी भर दिला. येणाऱ्या काळातही माझे काम सुरूच राहणार आहे. कार्यकर्त्यांना बळ देण्यासाठी आपण येणाऱ्या काळातील सर्व निवडणुका उपमुख्यमंत्री पवार यांच्या मार्गदर्शनाखाली लढणार असल्याचे त्यांनी स्पष्ट केले. अण्णा पवार, ऍड. अजित विघ्ने, चंद्रकांत सरडे, सुहास गलांडे, वामराव बदे आदींनी मनोगत व्यक्त केले. सामाजिक कार्यकर्ते सुजित बागल यांनी आभार मानले.