पुणे : धाराशिव येथील शिवसेनेचे (ठाकरे गट) खासदार ओमराजे निंबाळकर यांनी त्यांचे बंधू जयराजे निंबाळकर यांच्याबद्दल तक्रार करणारे उद्योजक दिनेश मांगले यांना भ्रमणध्वनीवरून शिवीगाळ केल्याचा व धमकावल्याचा आरोप मांगले यांनी पत्रकार परिषदेत केला. या संदर्भात मांगले यांनी पोलिसांकडे तक्रार केली आहे.
जयराज निंबाळकर यांनी स्वतःचा भूखंड आपल्या संबंधातील बँकेकडे गहाण ठेवून आपल्या नावावर अडीच कोटीचे कर्ज घेतले. बँकेने आपली पात्रता नसतानाही हे कर्ज मंजूर केले. ही कर्जाची रक्कम जयराज यांनी स्वतः कडेच ठेवून घेतली. त्यानंतर एकही हप्ता भरला नाही. बँकेने आपल्या मागे वसुलीचा तगादा लावल्याने आपण 34 लाख भरले. मात्र, हे प्रकरण अंगलट येण्याच्या भीतीने आपण या व्यवहाराची कल्पना खासदार निंबाळकर यांना देण्यासाठी त्यांच्याशी संपर्क साधला. यावेळी त्यांनी आपले कोणतेही म्हणणे ऐकून न घेता उलट आपल्याला धमकी दिली व शिवीगाळ केली, असा मांगले यांचा आरोप आहे. जयराजे यांनी संबंधित भूखंड अन्य 14 जणांना विकून भूखंड घोटाळा केला आहे, असा आरोपही त्यांनी केला.
कर्ज प्रकरण आणि धमकी याच्या विरोधात आपण कायदेशीर मार्गाने कारवाई करण्याचे धोरण स्वीकारल्यानंतर जय राजे यांनी 24 लाख कर्ज खात्यात भरले आहेत. याप्रकरणी पोलिसांकडे तक्रार करण्याबरोबरच मुख्यमंत्री देवेंद्र फडणवीस आणि दोन्ही उपमुख्यमंत्र्यांना पत्रव्यवहार केला असल्याचेही सांगतानाच आपल्या जीवाला धोका असल्यामुळे आपल्याला संरक्षण मिळावे आणि भूखंड घोटाळ्यातील सर्व आरोपींवर कायदेशीर कारवाई करावी, अशी मागणी मांगले यांनी केली.
