करमाळा (अशोक मुरूमकर) : श्री आदिनाथ सहकारी साखर कारखान्याच्या निवडणुकीसाठी आज (बुधवारी) पहिला अर्ज दाखल झाला आहे. सालसे ऊस उत्पादक गटातून भानुदास शिंदे यांनी हा अर्ज दाखल केला आहे. आतापर्यंत ८० अर्जांची विक्री झाली असल्याची माहिती सहाय्यक निवडणूक निर्णय अधिकारी शिल्पा ठोकडे यांनी दिली आहे.
आदिनाथ सहकारी साखर कारखान्याची निवडणूक प्रक्रिया सुरु आहे. सोमवारपर्यंत (ता. १७) इच्छुकांना अर्ज दाखल करता येणार आहेत. यामध्ये तालुक्याच्या राजकारणातील पाटील, शिंदे, बागल व जगताप गटाच्या भूमिका महत्वाच्या आहेत. जगताप गटाची भूमिका मांडताना माजी आमदार जयवंतराव जगताप यांनी ही निवडणूक बिनविरोध करण्याची भूमिका स्पष्ट केली आहे. तर शिंदे गटाची भूमिका मांडताना माजी आमदार संजयमामा शिंदे यांनी ही निवडणूक लढण्याचे जाहीर केले आहे. पाटील व बागल गटानेही इच्छुकांना अर्ज दाखल करण्याचे आवाहन केले आहे. तर प्रा. रामदास झोळ हे देखील निवडणूक लढण्यावर ठाम आहेत. त्यामुळे शेवटपर्यंत कोणाच्या काय भूमिका राहतील हे पहावे लागणार आहे.
