करमाळा (सोलापूर) : माजी आमदार संजयमामा शिंदे गटाचे समर्थक वाशिंबे ग्रामपंचायतीचे सरपंच तानाजी झोळ यांच्यावर आमदार नारायण पाटील यांचे समर्थक नवनाथ झोळ यांनी केलेला आरोप जिल्हाधिकाऱ्यांनी फेटाळला आहे. त्यामुळे तानाजी झोळ यांचे सरपंचपद अबाधित राहिले आहे. तीन अपत्य असल्यामुळे त्यांचे सरपंच पद रद्द करण्यात यावे अशी मागणी करण्यात आली होती. यामध्ये ग्रामविकास अधिकारी यांनाही प्रतिवादी करण्यात आले होते.
या प्रकरणात न्याय निवाडा करताना महाराष्ट्र ग्रामपंचायत अधिनियम १९५८ कलम १४-१ ज-१ अन्वये जिल्हाधिकारी यांच्या आदेशानुसार नवनाथ झोळ यांचा अर्ज नामंजूर करण्यात आला आहे. या निकालाची प्रत तहसीलदार करमाळा यांनाही पाठविण्यात आली आहे. सरपंच झोळ यांनी म्हटले आहे की, ‘वाशिंबे ग्रामपंचायत निवडणुकीत नागरिकांनी मला मतरूपी आशीर्वाद दिला होता. गावात कोणतेही राजकारण न करता विकासासाठी माजी आमदार संजयमामा शिंदे यांच्या प्रयत्नातून निधी उपलब्ध करून घेतला आहे. गावाचा विकास हाच आपला ध्यास असल्यामुळे विरोधकांनी दाखल केलेले अपील नामंजूर करण्यात आले. हा विकास कामांचा विजय आहे. येणाऱ्या काळामध्ये मुख्यमंत्री देवेंद्र फडणवीस, उपमुख्यमंत्री अजितदादा पवार, पालकमंत्री जयकुमारजी गोरे, आमदार सचिन कल्याणशेट्टी, माजी आमदार रामभाऊ सातपुते यांच्या नेतृत्वाखाली आणखी निधी उपलब्ध करणार आहे.
