करमाळा (सोलापूर) : करमाळा शहरात कुंभारवाडा येथे खंदका जवळ केलेले अतिक्रमण काढण्यात यावे, अन्यथा प्रजासत्ताक दिनी शुक्रवारी (ता. २६) करमाळा नगरपालिकेसमोर आत्मदहन केले जाईल, असा इशारा येथील विशाल कुंभार यांनी लेखी निवेदनाद्वारे उपविभागीय अधिकारी प्रियंका अंबेकर व मुख्याधिकारी बालाजी लोंढे यांना निवेदनाद्वारे दिला आहे.
कुंभार यांनी निवेदनात म्हटले आहे की, कुंभारवाडा जवळील खंदक रोडवर पदाचा गैरवापर करून माजी नगरसेविका सीमा कुंभार व त्यांच्या नातेवाईकांनी झाडे तोडून सरकारी जागेवर अतिक्रमण केले आहे. त्यांच्यावर कारवाई करण्यात यावी व नगरपालिकेने तात्काळ अतिक्रमण काढावे. यासाठी वेळोवेळी प्रशासनाकडे पाठपुरावा करूनही दखल घेतली जात नाही, असे त्यांनी निवेदनात म्हटले आहे.
