सोलापूर : साहित्यरत्न लोकशाहीर अण्णाभाऊ साठे विकास महामंडळ प्रोत्साहनपर शिष्यवृत्ती योजनेचा लाभ घेण्यासाठी इच्छुकांनी १५ जुलैपर्यंत महामंडळाचे जिल्हा कार्यालय, डॉ. बाबासाहेब आंबेडकर सामाजिक न्याय भवन, सात रस्ता, शासकीय विश्रामगृहाच्या पाठीमागे, बिग बजार समोर, सोलापूर येथे प्रत्यक्ष अथवा पोष्टाव्दारे अर्ज सादर करावेत, असे आवाहन मंडळाच्या जिल्हा व्यवस्थापकांनी पत्रकाद्वारे केले आहे.
पत्रकात म्हटले आहे, साहित्यरत्न लोकशाहीर अण्णाभाऊ साठे विकास महामंडळ (मर्या.) मार्फत सन २०२२-२३ या शैक्षणिक वर्षात इयत्ता १० वी, १२ वी, पदवी, पदव्युत्तर, वैद्यकीय व अभियांत्रिकी अभ्यासक्रमामध्ये विशेष प्राविण्याने ६० टक्क्यांपेक्षा जास्त गुण मिळवून उत्तीर्ण झालेल्या मांग, मातंग, मिनी-मादीग, मादींग, दानखणी मांग, मांग महाशी, मदारी, राधेमांग,मांग गारुडी, मांग गोराडी, मादगी व मादिगा या जातीतील विद्यार्थी/विद्यार्थिनींना महामंडळाकडून जेष्ठता व गुण क्रमांकानुसार निधीच्या उपलब्धतेनुसार महामंडळाकडे प्राप्त झालेल्या अर्जापैकी प्रथम ०३ ते ०५ विद्यार्थ्यांना प्रोत्साहनपर अण्णाभाऊ साठे शिष्यवृत्ती योजनेचा लाभ देण्यात येणार आहे. त्यासाठी अर्जासोबत सन २०२२-२३ या शैक्षणिक वर्षात उर्तीण झाल्याची गुणपत्रिका, शाळा सोडल्याचा दाखला, जातीचा दाखला, पुढील वर्षात प्रवेश घेतल्याची पावती, रेशनकार्ड व आधारकार्ड ही कागदपत्रे जोडणे आवश्यक आहे. विहित मुदतीनतंर प्राप्त अर्ज स्वीकारले जाणार नाहीत याची नोंद घ्यावी, असे पत्रकात म्हटले आहे.
