करमाळा (सोलापूर) : माजी आमदार संजयमामा शिंदे यांनी आज (शुक्रवारी) राजुरी येथील विविध विकास कामांची पाहणी केली. विधानसभा निवडणुकीनंतर माजी आमदार शिंदे यांचा प्रथमच जनता दरबार झाला. दरम्यान राजुरी वीज उपकेंद्राला त्यांनी भेट दिली. त्यांच्या कार्यकाळात याला मंजुरी मिळाली होती.

या वीज उपकेंद्रामुळे राजुरीतील विजेचा प्रश्न सुटणार आहे. दोन महिन्यात हे वीज उपकेंद्र राजुरीकरांच्या सेवेत खुले होणार आहे. करमाळा मतदारसंघाच्या ग्रामीण विकासाचा केंद्रबिंदू असलेला राज्यातील सर्वाधिक लांबीचा हॅम या योजनेखाली मंजूर होऊन काम सुरु असलेल्या सावडी ते वेणेगाव फाटा या रस्त्याच्या कामाची ही माजी आमदार शिंदे यांनी पाहणी केली.

71 किलोमीटरच्या या रस्त्यासाठी 271 कोटी निधी असून हा रस्ता दुपदरी सिमेंट काँक्रिटीकरण आहे. या रस्त्यामुळे सावडी, राजुरी, पोधवडी, अंजनडो, झरे, कुंभेज, कोंडेज, निंभोरे, मलवडी व केम ही करमाळा तालुक्यातील 11 गावे तर उपळवटे, दहिवली, कन्हेरगाव व वेणेगाव ही माढा तालुक्यातील चार गावे सोलापूर व पुणे या राष्ट्रीय महामार्गाला व नगर जिल्ह्याला जोडली जाणार आहेत. यावेळी तानाजी झोळ, नंदकुमार जगताप, महादेव आडसूळ, वैभव पाटील, संजय सारंगकर, सुनील पाटील, भाऊसाहेब जाधव, सुहास गरुड, उदय साखरे, आर. आर बापू साखरे, दादा बापू साखरे उपस्थित होते.