करमाळा (अशोक मुरूमकर) : करमाळा कृषी उत्पन्न बाजार समितीच्या निवडणुकीत बागल, पाटील व जगताप गटामध्ये समझोता झाल्यानंतर आमदार संजयमामा शिंदे गटाचे समर्थक व सावंत गटाचे प्रमुख सुनील सावंत यांनीही उमेदवारी अर्ज मागे घेतला आहे. ‘माजी आमदार जयवंतराव जगताप आणि आमदार शिंदे यांच्या आदेशाने आपण अर्ज मागे घेतला असल्याचे’ त्यांनी ‘काय सांगता’ न्यूज पोर्टलशी बोलताना स्पष्टीकरण दिले आहे.
सावंत म्हणाले, तालुक्याच्या विकासाच्या दृष्टीनेही सर्व गटाने समझोता करावा. या निवडणुकीतून मी अर्ज मागे घ्यावा म्हणून माजी आमदार जगताप यांनी स्वतः आमचे बंधू पपू सावंत यांच्याशी संपर्क साधला होता. आमदार शिंदे यांनी थेट माझ्याशी बोलून अर्ज मागे घेण्याबाबत सांगितले होते. वरिष्ठ व प्रमुखांचा मान राखत आपण तालुक्याच्या दृष्टीने निवडणुकीतून अर्ज मागे घेतला आहे, असे ते म्हणाले आहेत.