करमाळा (सोलापूर) : कुर्डुवाडी- करमाळा मार्गावर सालसे चौकात एका बोलेरोने दुचाकीला धडक दिली. त्यात दुचाकीवरील दाम्पत्य ठार झाले आहे. मनोज काळे गुरव (वय ४८) व पुष्पा मनोज काळे (वय ४२, रा. किल्ला वेस, करमाळा) असे त्याचे नाव आहे. या अपघातात पुष्पा काळे या जागीच तर मनोज काळे यांचा उपचारा दरम्यान मृत्यू झाला आहे. सोमवारी (ता. २७) सायंकाळी हा अपघात झाला असल्याचे समजत आहे.
काळे दाम्पत्य माढा येथे नातेवाईकांच्या कार्यक्रमासाठी दुचाकीवर गेले होते. तेथून परतत असताना सालसे चौकात हा अपघात झाला. बोलेरोने त्यांच्या दुचाकीला मागून जोराची धडक दिली. त्यात काळे गंभीर जखमी झाले. मनोज काळे यांना करमाळ्यात उपचारासाठी आणले. तेथून त्यांना बार्शी येथे पाठविण्यात आले. दरम्यान त्यांचा मृत्यू झाला असल्याचे सांगितले जात आहे. त्यांच्या पश्चात एक मुलगा, मुलगी व सून असा परिवार आहे.
