नवी दिल्ली : लोकसभा निवडणुकांचे शनिवारी (ता. १६) बिगुल वाजणार आहे. शनिवारी दुपारी ३ वाजता केंद्रीय निवडणूक आयोगाची पत्रकार परिषद होणार आहे. यामध्ये २०२४ ची लोकसभा व काही राज्यांच्या विधानसभा निवडणुकांचे वेळापत्रक जाहीर होणार आहे.
५४३ लोकसभा मतदारसंघातील निवडणुकांच्या कार्यक्रमाची घोषणा यावेळी होणार आहे. निवडणुकांच्या घोषणांपाठोपाठ देशभरात आचारसंहिता लागू होईल. निवडणुकीच्या घोषणेकडे राजकीय वर्तुळासह सर्वसामान्य मतदारांचे लक्ष लागले आहे. २०२४ च्या लोकसभा निवडणुकांमध्ये एनडीए आघाडी विरुद्ध इंडिया महाआघाडी अशी मुख्य लढत होणार आहे. या निवडणुकांमध्ये कोणाला बहुमत मिळणार याकडे सर्वांचे लक्ष आहे.
केंद्रीय निवडणूक आयोग अपवादानेच शनिवार किंवा रविवारी पत्रकार परिषद घेते. यावेळी आधीच घोषणांना दिरंगाई झाल्यामुळे आयोगाने शनिवारचा दिवस निवडल्याचे दिसते. निवडणूक आयोगाच्या सोशल मीडिया प्लॅटफॉर्मवर ही पत्रकार परिषदेचे थेट प्रक्षेपण केले जाणार आहे. किती टप्प्यात निवडणूक होणाणार, कुठल्या राज्यात कधी मतदान होणार, कुठल्या दिवशी निवडणुकांचा निकाल जाहीर होणार याकडे सर्वांच्या नजरा लागून राहिल्या आहेत. देशात सात टप्प्यात लोकसभांचे मतदान होण्याची शक्यता वर्तवली जात आहे. निवडणूक आयोग यंदा मतदान आणि निवडणूक प्रक्रियेबाबत काही नाविन्यपूर्ण घोषणा करणार का, याचीही उत्सुकता लागून राहिली आहे.
