करमाळा (सोलापूर) : करमाळा येथे आयडीबीआय बँकेचे चोरट्यांनी एटीएम फोडल्याने संपूर्ण जिल्ह्यात खळबळ उडाली आहे. ही टोळी परप्रांतीय असल्याचा संशय असून पोलिस अधिक्षक शीरिष सरदेशपांडे यांनी नागरिकांना सतर्कतेचे आवाहन केले आहे. पोलिस अधिक्षक सरदेशपांडे यांनी ग्रामसुरक्षा यंत्रणेवर संदेश देत म्हटले आहे की, सोलापूर जिल्ह्यात एटीएम फोडणारी परप्रांतीय टोळी आली आहे. ही टोळी रात्री एटीएम मशीनला टार्गेट करत आहे. एटीएम मशीन फोडून त्यातील रोकड लंपास करत आहे. हरियाणा पाशिंगच्या ज्या गाड्या आहेत त्यांच्यावर संशय असून त्यांचा शोध सुरु आहे. आपल्या परिसरात कोणत्याही एटीएममध्ये रात्रीच्यावेळी कोणी छेडछाड करत असले तर किंवा संशयास्पद जाणवत असले किंवा थांबून असले तर एखादे वाहन आजूबाजूला तर कृपया आपल्या पोलिस ठाण्याशी संपर्क साधा, असे आवाहन करण्यात केले आहे.