करमाळा (सोलापूर) : कुकडी प्रकल्प कालवा सल्लागार समितीची बैठक शुक्रवारी (ता. 20) पुणे येथील व्हीव्हीआयपी सर्किट हाऊस येथे उपमुख्यमंत्री अजित पवार यांच्या अध्यक्षतेखाली झाली. या बैठकीमध्ये कुकडी प्रकल्पाची दोन आवर्तने सोडण्याचे निश्चित झाले आहे. डिसेंबर व मार्चमध्ये ही आवर्तने सुटणार असून मेमध्ये तिसरे आवर्तन मिळावे, यासाठी प्रयत्न सुरु असल्याचे आमदार संजयमामा शिंदे यांनी ‘काय सांगता’ न्यूज पोर्टलला सांगितले आहे.

आमदार शिंदे म्हणाले, 15 डिसेंबर 2023 ते 23 जानेवारी 2024 असे आवर्तन प्रस्तावित असून दुसरे आवर्तन 1 मार्च 2024 ते 9 एप्रिल 2024 असे आहे. तर तिसरे आवर्तन मिळवण्यासाठी प्रयत्नशील आहोत. डिसेंबरमध्ये सुरू होणाऱे आवर्तन 15 डिसेंबर ऐवजी 1 डिसेंबर पासून सुरु करावे, अशी मागणी आहे. सदर आवर्तन टेल टू हेड मिळणार असून करमाळा तालुक्याला 13 दिवस सलग पाणी मिळणार आहे. या पाण्याचे मोजमाप करताना करमाळा तालुक्याला पाणी पोहोचल्यानंतरच त्याचे दिवस मोजण्यात येतील, अशी माहितीही त्यांनी दिली. यावेळी यावेळी सहकार मंत्री दिलीप वळसे पाटील, आमदार रोहित पवार व महाराष्ट्र कृष्णा खोरे विकास महामंडळाचे अधिकारी उपस्थित होते.