करमाळा (सोलापूर) : तालुक्यातील सालसे येथे अनोळखी चौघांनी सशस्त्र हल्ला करुन घरातील १ लाख ३ हजार ५०० रुपयांचा मुद्देमाल घेऊन पसार झाले आहेत. शनिवारी (ता. ४) पहाटे २ वाजताच्या सुमारास हा प्रकार घडला आहे. यामध्ये मधुकर संतराम आडसुळ (वय ६५, रा. सरकारी विहीरीजवळ, सालसे) यांनी फिर्याद दिली आहे.
घरासमोरील गोठयात गाय ओरडल्याचा आवाज आल्याने अडसूळ यांनी दरवाजा उघडला तेव्हा अचानकपणे अनोळखी चौघांनी घरामध्ये जबरदस्तीने घुसुन फिर्यादीच्या घरातील पेटया व डबे उघडण्यास सुरूवात केली. त्यांना अडविण्याचा प्रयत्न केला. म्हणुन त्यापैकी एकाने चाकुने वार करुन अडसूळ यांना जखमी केले. त्यापैकी एकाने काठीने मारहाण केली. तेव्हा अडसूळ यांची पत्नी सोडवण्यासाठी आली तेव्हा त्यांनाही मारहान केली.
यामध्ये १५ हजार रोख व १५ ग्रॅमचे सोन्याचे गंठण, ९ हजाराचे २ गॅमचे मंगळसुत्र, ९ हजाराची सोन्याची फुले, ३ हजाराचे तीन फोन असा १ लाख ३ हजार ५०० रुपयांचा मुद्देमाल जबरदस्तीने काढुन घेवुन गेले. याचा पुढील तपास करमाळा पोलिस करीत आहेत.