मुंबई : बंड करत शिंदे- फडणवीस सरकारमध्ये सामील झालेल्या राष्ट्रवादीच्या मंत्र्यांनी आज (रविवारी) अचानक यशवंतराव चव्हाण प्रतिष्ठान येथे राष्टवादीचे सर्वेसर्वा शरद पवार यांची भेट घेतली. यावेळी उपमुख्यमंत्री अजित पवार यांच्यासह मंत्री छगन भुजबळ, दिलीप वळसे पाटील, हसन मुश्रीफ, आदिती तटकर, तसेच विधानसभेचे उपाध्यक्ष नरहरी झिरवळ उपस्थित होते.
राष्ट्रवादीतील बंडखोर नेते शरद पवार यांना भेटल्याने संपूर्ण राष्ट्रवादीच सत्तेत सहभागी होणार का, अशी चर्चा रंगू लागली आहे. याबाबत राष्ट्रवादीचे (शरद पवार गटाचे) प्रदेशाध्यक्ष जयंत पाटील म्हणाले, ‘आम्ही याआधीच सरकारसोबत न जाण्याचा निर्णय घेतला आहे. आम्ही त्या निर्णयावर सध्या ठाम आहोत. बंडखोर नेत्यांनी केलेल्या विनंतीवर काय उत्तर द्यायचं, हा आमच्या पक्षाचे अध्यक्ष शरद पवार यांचा प्रश्न आहे,’
पुढे बोलताना ते म्हणाले, ‘पावसाळी अधिवेशनाच्या पार्श्वभूमीवर विरोधी पक्षांनी आयोजित केलेल्या बैठकीला मी उपस्थित होतो. त्यावेळी मला अचानक खासदार सुप्रिया सुळे यांचा फोन आला. आपण तात्काळ यशवंतराव चव्हाण प्रतिष्ठान येथे यावे, अशी शरद पवारसाहेबांची सूचना असल्याचं सांगितले. त्यानंतर मी इथे आलो. राष्ट्रवादीपासून वेगळी भूमिका घेऊन सरकारसोबत गेलेल्या नेत्यांनी शरद पवारांकडे या बैठकीत दिलगिरी व्यक्त केली. तसंच या सगळ्यातून पक्ष एकसंध राहावा, यासाठी मार्ग काढण्याची विनंती केलेली आहे. मात्र पवारसाहेबांनी या विनंतीवर कोणतीही प्रतिक्रिया दिलेली नाही,’ अशी माहिती पाटील यांनी दिली आहे.